mi olin e nasin sona mute li wile toki e ona la mi kama sona e ni: toki pona la toki kulupu pi sona suli li lili a lon linluwi tawa jan ale. tenpo sin la toki en sitelen pi pilin suli li kama mute. taso ona li awen kulupu ala li taso. toki pona la ni li ike pi suli nanpa wan tawa mi. lipu ni la mi alasa kama sona e tan mute ona.
jan li ken toki e sona suli ona lon ma mute. taso ona li ni ala. ken la ni li tan ike ma. ma ale li tawa toki ante. ona li ken tawa ala toki kulupu pi pilin suli.
ilo Siko la ma pona pi toki pona li wile ma tawa toki kulupu mute. taso jan pi mute lili taso li toki e ijo suli anu pilin suli lon ona. jan pi mute nanpa wan li toki lon ma ni la weka pi toki ni li ike a lon ona. taso jan li ken sona e ni tan lon ona pi ilo Siko. ona li tawa toki kulupu pi jan mute a la toki ona li ken ala suli li ken ala awen lon tenpo mute. taso toki pi sona suli li wile a e ijo tu ni. kin jan mute a li lon ona. jan wile toki e sona ona la ona li wile toki tawa jan poka ona taso lon tenpo mute. ma pona pi toki pona la ona li ken ala ni.
lipu Wesi la mi pilin e ni lon open: ona li ma pi pona nanpa wan tawa ni. jan li ken sitelen e ijo suli li ken toki sama ni tawa ona pi jan ante kin. lipu Wesi li nasin kin e toki kulupu lon anpa pi toki ante. ni la toki suli li ken kama pona tawa lukin anu kama sona. ona la jan li ken sitelen kepeken tenpo mute. kin ona li ken lukin e toki pi jan ante lon tenpo mute. taso jan pi mute lili taso li toki e pilin suli ona lon lipu Wesi kin tan seme? jan pi mute lili taso li lon lipu Wesi. kin mute pi jan toki li lili tawa mute ni. pini la kulupu pi lipu Wesi li tawa kulupu lon. kulupu pi toki pona la kulupu ante pi sona suli li lon ala insa.
toki kulupu li wile e ma taso ala li wile e jan kin tawa ona. ken la jan pi toki pona li ike tawa toki kulupu pi pilin suli. jan pi kulupu ale li wile toki e ijo ante. ken la jan kulupu pi toki pona li wile ala toki e ijo suli.
toki mute pi sona suli li kama lon kepeken toki pona lon tenpo pini. toki pi sona suli li lon. toki kulupu li lon ala. jan li toki e kulupu pi toki pona kepeken toki pona. anu ona li toki e ijo ante kepeken toki Inli kepeken ala toki pona. taso tenpo sama la ona li wile e toki e ijo ni lon toki kulupu pi toki pona.
nanpa wan la mi pilin e ni: jan pi sona suli li toki e pilin suli ona kepeken toki pona la ona li toki tawa jan poka ona taso li toki tawa ala jan ale. ni taso li ike ala. taso toki kulupu ni ala li lon tawa jan ale la ona li kama ike.
ni li ken tan ni: ma pi toki pona la jan pi mute nanpa wan li jan pi kama sona. ni la ma en kulupu li kama tawa ona lon tenpo nanpa wan.